聖誕就到，又係大家放長假嘅時候，吃喝玩樂開心之際，其實暗藏增磅危機！唔想無端端「中招」變咗肥仔肥妹，就要留意以下5大致肥陷阱！
陷阱1：放假大放鬆 : 每逢大時大節，平日緊張嘅返工返學生活都會一下子放鬆，連續幾日假期有足夠理由去瞓去懶。
當然唔少得暴飲暴食嘅派對同聚餐，而去gym做運動就順理成章放埋一邊。
想防止懶惰成為唔做運動嘅藉口，就需要一啲紀律，就算玩到無時間去gym，都可以喺屋企跳繩、做柔軟體操，唔使多，20分鐘就夠。去旅行亦係一樣，pack埋對跑鞋，善用酒店設施做運動啦！
陷阱2：假期壓力 : 買咩禮物、去邊食嘢、安排咩節目都可以帶來壓力，單係諗起都叫人心跳加速兼血壓上升。
忙住準備節日，加上去做運動嘅動力降低，好容易產生壓力皮質醇，人會易啲水腫同增磅。
而做運動就有效對抗壓力，伸展柔軟體操、掌上壓、舉重等都可以喺屋企做到，10分鐘簡單運動，話咁快就做完，當壓力清除咗，晏啲仲想做多啲運動添！
陷阱3：食的誘惑 : 其實成屋薯片朱古力等零食，都係另一個致肥陷阱！因為越隨手可得，就越容易擺佢哋入口。
要解決好簡單，原則就係：眼不見為乾淨。收埋所有零食飲品，收埋喺廚櫃又好雪櫃又好，就算係曲奇餅都要搵個密封不透明嘅罐裝好，務求唔會「唔小心」見到時忍唔住食咗。朋友嚟開party食剩嘅嘢，就可以鼓勵佢哋打包帶走。
陷阱4：天氣凍，唔想郁 : 有邊個會想在寒風直吹嘅大清早，離開暖笠笠被窩去跑步？
要抵抗被窩的引力，就要靠意志力堅持起身，先喺屋企做熱身，盡快令身體暖和先出去跑步。或者好似上文提及過嘅，在家做運動都得架！
陷阱5：朋友影響 : 身邊朋友最鍾意話：「食多少少啫，唔怕嘅!」、「做少一次半次運動，唔緊要啦 !」，會影響到你都覺得假期暴飲暴食、懶做運動無咩問題，有咁嘅心態真係會好容易肥多幾磅。
可以試吓喺節日中除了咗吃喝玩樂之外，俾自己小小目標，例如多啲陪屋企老人家、完成某樣小手工、睇完一本書等等，總之將注意力轉移，唔好淨係掛住食食食。甚至可以約朋友郊遊行山，總之郁動多啲，就唔怕節日增磅。
資料來源 : http://hk.lifestyle.yahoo.com/%E5%B0%8F%E5%BF%83-5%E5%A4%A7%E7%AF%80%E6%97%A5%E8%87%B4%E8%82%A5%E9%99%B7%E9%98%B1-005000590.html
留言列表
___香港站 (人) ___ (0)